كلٌ في فَـــلَـــكٍ يَسْبَحونْ

و انت صغير قاعد جنب والدك, يجيله تليفون , يقوله "اهلاً فلان باشا واحشنا و الله فين أراضيك؟" , و يكمل"مبسألش ايه بس مانت عارف , الواحد عامل زي اللي بيلف في طاحونة."..او بعض الناس تقول "كأني بالف في ساقية", محدش فكر اشمعنى الطاحونة او الساقية؟ طب محدش خد باله من جُملة "هتلف تلف و ترجعلك" لما كنا بنشتم بعض , طب برضه جملة " الدنيا دوَارة" , ايه معنى الكلام ده كله؟ طب و كلام ربنا عز و جلَّ "لا الشَّمْسُ يَنبَغِي لَهَا أَن تُدْرِكَ الْقَمَرَ وَلا اللَّيْلُ سَابِقُ النَّهَارِ وَكُلٌّ فِي فَلَكٍ يَسْبَحُونَ"    , اشمعنى الدايرة؟؟ لما قعدت افكر شوية , لقيت ان الحياة داين تُدان...و فعلاً اي حد بيعمل حاجة بترجعله .. عاملين زي اللي بيمشي في دايرة و ساب حاجة في نقطة سواء كانت صح او غلط , و هيكمل مشي , يوم من الأيام هيرجع لنفس النُقطة تاني بأي شكل من الأشكال , هيلاقي عمله ده , طب كل ما تزود نُقطك الكويسة المليانة اعمال كويسة , هترجع تلاقيها تاني , و العكس صحيح برضه , "كلٌ في فَلَكٍ يسبحون" شايفين الدقة في الوصف؟؟ تقدر تطبق الجملة دي على اي حاجة في حياتك! كلنا فعلاً كل واحد فينا في فلك, مهما كان في حاجات مشتركة بينك و بين اقرب الناس ليك , بس هيفضل فَلَك مختلف تماماً , ده لما بيحصل ان نيزك بيخرج عن الفَلَكْ او المدار بتاعه يصطدم بأي جسم في طريقه , و بالتالي البني آدمين ,مش يقولك خليك في حالك يا عم!  , مثلاً لو في 2 بيحبوا بعض اوي ....زي مين...زي الأم و ابنها  , لما بييجي يتجوز او يختار شريكة حياته هي ممكن من فَرط حبها ليه , تتدخل بطريقة تُفسد حاجة كانت سبب في إسعاده, السبب انها خرجت من مدارها اللي هو حياتها زيادة عن المطلوب مما أدى لتصادم مع ابنها اللي هو ليه مدار خاص بيه أدرى بقانون الجذب و الطرد فيه , مما أدى لتصادم..  , معنى كدة أن كل واحد بيختار مركز الفلك بتاعه كمان , في ناس بتختار حب الدنيا , في ناس بتختار حب الذات , في ناس بتختار الحياة الشهوانية , في ناس قِلة بتختار ربنا , يبقى هو مركز حركاتها و سكناتها و همساتها و كل شيء في حياتها! هل يا ترى ده وعظ يعني او بقولكم معلومة جديدة ؟ لأ , انا بس باقول على اللي جه على بالي  J .